John 18

Judas na Yesus osiq jeu tamo naŋgo baŋq di atej

1Yesus a degsi Qotei pailyosiq koboonaqa a na aqa aŋgro naŋgi joqsiqa koba na walwelosib Kidron ya dosib taqal beiq aisib nañu agu beiq di soqneb. 2Bati gaigai Yesus aqa aŋgro naŋgi koba na nañu agu dia korooqneb. Deqa Yesus aqa aŋgro Judas agi Yesus osim jeu tamo naŋgo baŋq di atqas qaji a nañu agu di qaliesoqnej. 3Deqa a na qaja tamo gargekoba naŋgi waŋal ti lam ti sebru ti eleŋonab joqsiqa nañu agu deq gileb. Atra tamo kokba ti Farisi ti naŋgi na naŋgi qariŋnjrnab Yesus ojqa gileb. 4Gulube kalil Yesus aqaq di brantqas qaji di a nami qaliesoqnej. Deqa jeu tamo naŋgi aqaq bonabqa a naŋgo areq gilsiqa nenemnjrej, “Niŋgi yai qa bonub?”

5Onaqa naŋgi na kamba minjeb, “Iga Yesus Nasaret qaji a qa bonum.” Onaqa Yesus na minjrej, “E agiende.” Judas agi Yesus osiqa jeu tamo naŋgo baŋq di atej qaji a naŋgi koba na tigelesoqneb. 6Onaqa naŋgi Yesus aqa anjam di qusibqa qore na ululoŋosib ŋereŋeb.

7Onaqa Yesus na olo nenemnjrej, “Niŋgi yai qa bonub?” Onaqa naŋgi na minjeb, “Iga Yesus Nasaret qaji a qa bonum.” 8Onaqa Yesus na minjrej, “E nami merŋgonum, e agiende. Niŋgi e qa bonub di e segi ojiye. Ijo aŋgro naŋgi uratnjrib gileb.” 9Yesus a naŋgi anjam degsi minjrej deqa aqa anjam bei nami marej qaji di aqa damu brantej. Agi a nami endegsi marej, “O Abu, tamo kalil ni na e ebem qaji bei e na uratit padalqasai.”

10Onaqa jeu tamo naŋgi Yesus ojeqnab Saimon Pita a na aqa sebru osiqa atra tamo gate aqa kaŋgal tamo bei gateq di qalqajqa waiyej grotosiqa dabkala segi gentetej. Kaŋgal tamo di aqa ñam Malkus. 11Onaqa Yesus na Pita minjej, “Ino sebru olo ate. Jaqatiŋ kalil ijo Abu na ebqa merbej qaji di e oqai. Jaqatiŋ di ya uge uyo bul.”

Naŋgi Yesus ojsib Anas aqa talq osib gileb

12Onaqa qaja tamo naŋgi ti naŋgo gate ombla na Yesus ojsib aqa baŋ tonteteb. 13Osib Kaiafas aqa soube Anas aqa talq osib gileb. Kaiafas a wausau deqa Juda naŋgo atra tamo gate soqnej. 14Agi a na nami Juda tamo kokba naŋgi minjrej, “Tamo qujai a tamo uŋgasari kalil qa moiqas di kere.”

Pita a marej, “E Yesus aqa aŋgro sai”

15Naŋgi Yesus osi gileqnabqa Saimon Pita wo Yesus aqa aŋgro bei wo naŋgi qoreq na daurnjrsib gileb. Yesus aqa aŋgro di atra tamo gate a qalie. Deqa a Yesus dauryosiq torei jeŋ miligiq gilsiq atra tamo gate aqa talq di brantej. 16Ariya atra tamo gate a Pita qaliesai. Deqa Pita a siraŋme qalaq oqeq di tigelesoqnej. Onaqa Yesus aqa aŋgro agi atra tamo gate a qaliesoqnej qaji a na bosiq kaŋgal uŋa siraŋme taqatoqnej qaji di minjnaqa odyonaqa Pita osiq ombla na jeŋ miligiq gilsib tal qalaq di tigelesoqneb. 17Onaqa kaŋgal uŋa siraŋme taqatoqnej qaji a na Pita nenemyej, “Ni Yesus aqa aŋgro bei kio?” Onaqa Pita na kamba minjej, “Eo. E aqa aŋgro sai.” 18Tal qalaq dia atra tamo gate aqa kaŋgal tamo naŋgi ti aqa tal taqato tamo ti naŋgi yornjrnaqa ŋam tuŋguyosib ŋamyuo areq di tigelesosib ŋam yoroqneb. Onaqa Pita a dego bosiq naŋgi koba na tigelesosib ŋam yoroqnej.

Naŋgi na Yesus osib atra tamo gate aqa ulatamuq dia tigelteb

19Ariya bati deqa qaja tamo naŋgi na Yesus osi gilsib atra tamo gate aqa tal gogetosib aqa ulatamuq di tigelteb. Tigeltonabqa atra tamo gate a na anjam gargekoba Yesus nenemyoqnej. Yesus aqa aŋgro naŋgi qa ti aqa anjam tamo uŋgasari naŋgi minjroqnej qaji deqa ti nenemyoqnej. 20Onaqa Yesus na kamba minjej, “E boleq na tamo uŋgasari naŋgi ijo anjam minjroqnem. E bati gaigai Juda naŋgo Qotei tal miligiq dia, atra tal miligiq dia, naŋgo koro sawaq dia ijo anjam palontosim minjroqnem. E uliosim anjam minjrosaioqnem. 21Deqa ni kiyaqa e nenemkobaibeqnum? Tamo uŋgasari ijo anjam quoqneb qaji naŋgi segi nenemnjrimqa naŋgi segi na mermqab. E anjam minjroqnem qaji di naŋgi qalie. Naŋgi segi na mermqab.”

22Yesus a na atra tamo gate degsi minjej. Onaqa qaja tamo bei Yesus aqa areq di tigelesoqnej qaji a na baŋ lubtosiqa Yesus aqa ulatamuq di qalej. Osiqa minjej, “Ni kiyaqa atra tamo gate aqa medabu ojonum?” 23Onaqa Yesus na kamba minjej, “E anjam maronum endi gisaŋamqa ubtsi merbe. Ariya ijo anjam boleamqa di ni kiyaqa e lubonum?”

24Onaqa Anas na aqa qaja tamo naŋgi minjrnaqa Yesus osib atra tamo gate Kaiafas aqaq gileb. Yesus aqa baŋ tontesonabqa osi gileb.

Pita a olo marej, “E Yesus aqa aŋgro sai”

25Ariya Saimon Pita a ŋamyuo areq di tigelesosiq ŋam yoreqnaqa tamo qudei naŋgi na minjeb, “Ni dego Yesus aqa aŋgro bei kio?” Onaqa Pita a saidosiq minjrej, “Eo. E aqa aŋgro sai.”

26Onaqa atra tamo gate aqa kaŋgal tamo bei a na Pita minjej, “E ni kio Yesus ombla nañu aguq di sonam numonum?” Tamo di agi Pita na tamo dabkala gentetej qaji aqa aube. 27Onaqa Pita a olo saidosiq minjej, “Di e sai.” Pita a na degsi minjnaqa bati qujai deqa tuwe anjamej.

Naŋgi na Yesus osib Pailat aqa talq osi gileb

28Onaqa nobqolo malu qameqnaq Juda tamo kokba naŋgi na Kaiafas aqa talq dena Yesus osib Rom naŋgo mandor koba Pailat aqa tal kobaqujaq osi gileb. Osi gilsib naŋgi segi Pailat aqa tal miligiq gilosai. Naŋgi endegsib are qaleb, “Pailat a Juda tamo sai. A sawa bei qaji tamo. Deqa iga aqa tal miligiq gilqa keresai. Gago dal anjam degsi unu. Iga aqa tal miligiq gilqom di iga une ti sqom. Sonamqa gago yori bati koba brantqas di iga iŋgi uyqa keresai.” Naŋgi degsi are qalsib deqa naŋgi segi Pailat aqa tal miligiq gilosai. 29Deqa naŋgi oqeq di tigelesonabqa Pailat a segi oqedosiq naŋgoq di brantej. Osiqa nenemnjrej, “Tamo endi a une kie yqo deqa niŋgi a osib ijoq bonub?” 30Onaqa naŋgi na Pailat minjeb, “Tamo endi a kumbra uge yosai qamu iga inoq osi bosai qamu.”

31Onaqa Pailat na olo minjrej, “Niŋgi na a osib nuŋgo segi dal anjam na aqa une qa pegiyiye.” Onaqa naŋgi na kamba Pailat minjeb, “Iga Juda tamo. Deqa iga na tamo moiotqa keresai.” 32Naŋgi Pailat degsib minjeb deqa anjam bei nami Yesus a marej qaji di aqa damu brantej. Agi Yesus a segi nami aqa moiqajqa gam ubtej.

33Onaqa Pailat a olo puluosiqa aqa tal miligiq gilsiqa aqa qaja tamo naŋgi minjrnaqa naŋgi na Yesus osib beb. Bonabqa Pailat na nenemyej, “Ni Juda naŋgo Mandor Koba e?” 34Onaqa Yesus na kamba minjej, “Ni ino segi areqalo na anjam di merbonum kio tamo qudei naŋgi na e qa saimonub qusim anjam di merbonum kio? Ni e merbe.” 35Onaqa Pailat na olo minjej, “Ni are qalonum, e Juda tamo e? Sai. E sawa bei qaji. Nuŋgo segi leŋ deqaji naŋgi na ni osi bonub. Agi atra tamo kokba naŋgi na ni ijoq osi bonub. Deqa ni merbe. Ni une kie yonum deqa ni osi bonub?”

36Onaqa Yesus na minjej, “Mandam endeqa mandor kokba naŋgi na tamo taqatnjreqnub e naŋgi unub dego sai. E mandam endeqaji mandor sai. Tamo e na taqatnjreqnum qaji naŋgi dego mandam endeqaji tamo sai. E mandam endeqaji mandor qamu Juda tamo kokba naŋgi e ojeqnab qamu ijo wau tamo naŋgi ti qotonub qamu.” 37Onaqa Pailat na olo Yesus nenemyej, “Ni bole mandor e?” Onaqa Yesus na minjej, “Od, ni kere merbonum. E mandor. E anjam bole ubtqajqa deqa mandamq aisim ŋambabem. Tamo kalil anjam bole dauryeqnub qaji naŋgi ijo anjam queqnub.” 38Onaqa Pailat na minjej, “Anjam bole di kie?”

Juda tamo kokba naŋgi na Pailat a Yesus ŋamburbasq di qamqajqa minjoqneb

Osiqa Pailat a olo tigelosiq oqedosiqa Juda tamo kokba naŋgoq gilsiqa minjrej, “E tamo endi aqa jejamuq di une bei unosai. 39Deqa e nuŋgo kumbra bei dauryqai. Nuŋgo kumbra bei agi endegsi unu. Wausau gaigai nuŋgo yori bati koba branteqnaqa e na Juda tamo qujai tonto talq dena uratoqnsim eŋgeqnum. Deqa niŋgi na merbiye. Wausau endeqa e tamo yai uratsiy eŋgwai? E nuŋgo mandor koba Yesus uratsiy eŋgwai e?” 40Onaqa Juda tamo kokba naŋgi olo tulaŋ siŋgila na saidosib minjeb, “Ni Yesus uratim oqedaiq. Tonto tamo Barabas uratim oqedem.” Barabas a leŋ ojo tamo bei.